Nesta segunda quincena de xullo comezou a prestar os seus servizos para a Asociación de Empresas Ribeira Sacra Next, David Diéguez Rodríguez, que se incorpora como xerente da Asociación.

A figura dunha xerencia foi, desde o inicio, unha necesidade prioritaria para a operatividade da Asociación de Empresas Ribeira Sacra Next. Buscábase un perfil moi completo e versátil para facerse cargo dun colectivo que implica a sectores moi diversos. Ao tempo, a xerencia tiña que ter un coñecemento do territorio e compartir a ilusión por este proxecto que segue materializándose.

Para iso contouse cunha empresa especializada en xestión de recursos humanos que preseleccionou ás persoas candidatas que despois pasaron un proceso de avaliación por parte dunha comisión designada pola Asociación. Deste proceso que levou varios meses, selecciouse a David Diéguez de 34 anos e natural de Lugo.

O novo xerente, que ten formación superior en Secretariado e fixo o Grao en Administración e Dirección de Empresas, desenvolveu a súa carreira na banca e en empresas de hostalaría, alimentación e distribución, tanto en España como no estranxeiro.

“Versatilidade, profesionalidade, interese, implicación e ilusión son algunhas das características que nos ofrece David Diéguez”, explica o comité avaliador. “David será a partir de agora a cara visible da Asociación e a persoa que aúne as nosas necesidades e demandas para poder darlles resposta. Comezou contrato coa Asociación o 18 de xullo e durante as próximas semanas poñerase en contacto con todas as empresas asociadas e colaborares da Asociación de Empresas Ribeira Sacra Next”.