Ribeira Sacra Next e ABANCA asinan un convenio de colaboración para impulsar o tecido empresarial do territorio.

A Asociación de Empresarios Ribeira Sacra Next continúa avanzando na creación de novas oportunidades para o tecido empresarial da comarca coa sinatura dun importante convenio de colaboración con ABANCA.

O acto de sinatura celebrouse hoxe na Adega Castrofiz e contou coa participación do presidente da Asociación de Empresarios Ribeira Sacra Next, Severino Rodríguez Díaz, e da directora territorial de ABANCA en Lugo, Zaira Dapena Castro, quen formalizaron un acordo orientado a facilitar ás empresas asociadas o acceso a servizos financeiros e solucións adaptadas ás súas necesidades.

Este convenio permitirá ás empresas, autónomos e profesionais integrados na asociación beneficiarse de condicións especiais nun amplo catálogo de produtos financeiros e servizos bancarios, pensados para favorecer o crecemento, a modernización e a competitividade do tecido económico da Ribeira Sacra.

Entre as principais vantaxes inclúense solucións de financiamento para investimentos e liquidez, liñas de crédito, leasing, pólizas de crédito, ferramentas para comercio exterior, así como servizos de banca dixital e sistemas de cobro adaptados ás necesidades actuais das empresas. O acordo tamén contempla condicións vantaxosas en TPV físicos e virtuais, facilitando a transformación dixital e a mellora dos sistemas de venda e pagamento dos negocios asociados.

Ademais, o convenio incorpora produtos e servizos específicos para autónomos e micropemes, así como solucións orientadas á internacionalización, á xestión do comercio online e á mellora da operativa financeira diaria das empresas.

Desde Ribeira Sacra Next destacan que este tipo de colaboracións son fundamentais para seguir fortalecendo o ecosistema empresarial da comarca, ofrecendo ás empresas ferramentas útiles e condicións competitivas que lles permitan afrontar novos proxectos e continuar xerando actividade económica e emprego no territorio.

Pola súa parte, ABANCA reafirma con este acordo a súa aposta polo desenvolvemento económico local e polo apoio ao tecido produtivo galego, mantendo unha colaboración próxima coas empresas e asociacións empresariais.

O convenio terá unha duración inicial dun ano, con posibilidade de prórroga, e estará dispoñible para todas as empresas asociadas a Ribeira Sacra Next.