A Asociación de Empresarios Ribeira Sacra Next estivo presente este martes, 29 de setembro, na xornada «Amas da Terra by Lucía Freitas: talento, territorio e emprendemento feminino», celebrada no Casino Ateneo de Monforte de Lemos.

A actividade foi organizada polo Polo de Emprendemento de Monforte, que vén desenvolvendo un excelente traballo no apoio, acompañamento e impulso de novas iniciativas empresariais e emprendedoras no territorio, e contou coa colaboración da Asociación de Empresarios Ribeira Sacra Next.

En representación da Asociación participou Marisol Borrajo, vicepresidenta de Ribeira Sacra Next e empresaria de Adega Vella, S.L. que interveu nunha das mesas da xornada xunto coa recoñecida cociñeira e empresaria galega Lucía Freitas e outras mulleres emprendedoras e empresarias. O encontro permitiu compartir experiencias, traxectorias profesionais e diferentes visións sobre o emprendemento, o liderado feminino e as oportunidades que ofrece o territorio.

Durante a xornada, Lucía Freitas realizou tamén unha exposición sobre a súa traxectoria profesional e empresarial. Natural de Santiago de Compostela, ao longo da súa carreira desenvolveu unha proposta gastronómica fortemente vinculada ao produto galego, ao territorio e á posta en valor das persoas produtoras. É a responsable de proxectos gastronómicos como A Tafona, distinguido cunha estrela Michelin, e Lume, no Mercado de Abastos de Santiago de Compostela.

Esta filosofía está tamén presente en Amas da Terra, unha iniciativa que busca poñer en valor o papel das mulleres na gastronomía, na cultura e no desenvolvemento do territorio, xerando espazos nos que compartir experiencias e crear novas redes de colaboración.

A xornada serviu como punto de encontro entre mulleres emprendedoras, empresarias, profesionais e axentes do territorio, favorecendo o intercambio de experiencias, a creación de contactos e a aparición de novas oportunidades de colaboración.

Desde Ribeira Sacra Next valoramos especialmente o traballo que desenvolve o Polo de Emprendemento de Monforte e este tipo de iniciativas, que contribúen a visibilizar o talento feminino, fortalecer o tecido empresarial e emprendedor e xerar novas redes de colaboración, elementos fundamentais para o desenvolvemento económico e social da Ribeira Sacra.

A colaboración da Asociación nesta actividade forma parte do seu compromiso por participar activamente nos espazos e iniciativas que contribúan á dinamización empresarial, á creación de oportunidades e ao desenvolvemento do conxunto do territorio.