Para facilitar oportunidades laborais no territorio.

A Asociación de Empresarios Ribeira Sacra Next mantivo un encontro co equipo do proxecto Laboratorio Digital Rural+, unha iniciativa promovida pola Fundación DKV Integralia, entidade cunha ampla traxectoria na cualificación e inserción laboral de persoas con discapacidade.

A través desta colaboración, Ribeira Sacra Next actuará como entidade facilitadora entre o proxecto e as empresas asociadas, co obxectivo de dar a coñecer perfís profesionais dispoñibles e favorecer posibles oportunidades laborais no territorio cando exista demanda por parte do tecido empresarial.

Neste sentido, a asociación poderá canalizar información sobre candidaturas, perfís profesionais e oportunidades de emprego a través da súa plataforma *empleo.ribeirasacranext.gal*, sempre en función das necesidades reais de contratación das empresas.

Esta colaboración non implica ningún custo económico para a asociación nin para as súas empresas asociadas, e busca achegar talento cualificado ao entorno rural, favorecendo a inclusión, a empregabilidade e a conexión entre empresas e persoas candidatas.

Desde Ribeira Sacra Next continuarase traballando para xerar vínculos con entidades e proxectos que contribúan ao desenvolvemento económico e social da Ribeira Sacra, impulsando novas oportunidades laborais e facilitando recursos útiles para as empresas do territorio.