A Asociación de Empresas Ribeira Sacra Next ten entre os seus obxectivos principais ofrecer contidos e servizos de valor para as empresas asociadas. A este respecto o emprego é unha das demandas máis importantes por iso impulsar a plataforma de emprego é un dos piares fundamentais.

Outra liña de traballo importante son os obradoiros, encontros e networkings empresariais. Nos últimos meses a Asociación organizou o Foro de Talento Feminino no Rural e obradoiros para empresas sobre subvencións e seguros. A xornada de seguros celebrouse precisamente a pasada semana no Centro do Viño da Ribeira Sacra coa colaboración de Allianz. Durante o encontro abordouse a importancia de que as empresas conten con seguros de responsabilidade civil, “para ser empresas socialmente responsables acordes cos tempos actuais”.

Repasáronse tamén outro tipo de seguros de carácter colectivo e relacionados co emprego e traballadores/as, que son os que máis demandas e sinistros provocan nas empresas, con reclamacións moi importantes. Outros aspectos a debate foron os beneficios fiscais dos seguros e a súa importancia para garantir a continuidade económica da empresa ante diferentes circunstancias.

As próximas actividades que se organizan desde a Asociación de Empresas Ribeira Sacra Next faranse en colaboración cos distintos polos de emprendemento do territorio de Ribeira Sacra, onde a Asociación concentra a súa actividade.