Grande acollida da xornada Potenciando os recursos da Ribeira Sacra en Nogueira de Ramuín.

Nogueira de Ramuín, 15 de abril de 2026

O Mosteiro de Santo Estevo acolleu este mércores a xornada “Potenciando os recursos da Ribeira Sacra”, que rexistrou aforo completo, evidenciando o alto interese existente arredor do desenvolvemento do territorio.

O encontro, organizado pola Asociación de Empresarios da Ribeira Sacra Next xunto co Polo de Emprendemento e Apoio ao Emprego do Carballiño, e coa colaboración do Concello e da Asociación de Empresarios de Nogueira de Ramuín, reuniu a profesionais, emprendedores e axentes locais.

Durante a xornada definíronse ideas e propostas concretas para abordar os principais retos do territorio, grazas á participación activa das persoas asistentes e ao traballo dinamizador do Polo de Emprendemento.

Desde a Asociación de Empresarios da Ribeira Sacra púxose de manifesto a necesidade de seguir incidindo na cooperación e coordinación de todos os axentes do territorio, co obxectivo de avanzar cara a unha folla de ruta común que permita orientar e focalizar os esforzos, contribuíndo así a un desenvolvemento máis eficaz e sostible da Ribeira Sacra.

Este tipo de iniciativas consolidan espazos de traballo compartido desde os que xorden solucións reais e coñecemento útil para impulsar o futuro do territorio.