O acordo permitirá ás empresas e persoas autónomas asociadas acceder a condicións preferentes na subministración de carburantes a través da Tarxeta Solred, contribuíndo á redución dos custos da súa actividade e á mellora da competitividade empresarial.

A Asociación de Empresas Ribeira Sacra Next continúa ampliando a súa rede de colaboracións coa sinatura dun novo convenio con Repsol, a través de Solred, co obxectivo de facilitar ás empresas e profesionais asociados o acceso a condicións vantaxosas na adquisición de carburantes e outros servizos relacionados coa mobilidade.

O acordo foi formalizado este 5 de novembro de 2026, en Monforte de Lemos, polo presidente da Asociación de Empresas Ribeira Sacra Next, Severino Rodríguez Díaz, e por Clara Pérez, responsable provincial de Repsol, consolidando unha nova alianza orientada a ofrecer solucións prácticas ás necesidades do tecido empresarial da Ribeira Sacra.

Esta colaboración permitirá ás máis de 100 empresas que forman parte da Asociación beneficiarse de condicións comerciais preferentes, especialmente relevantes para aquelas actividades nas que o transporte, os desprazamentos profesionais e a utilización de vehículos supoñen unha parte importante dos gastos habituais.

Vantaxes para as empresas asociadas:

A través deste convenio, as empresas e persoas autónomas pertencentes a Ribeira Sacra Next poderán acceder a descontos exclusivos na adquisición de carburantes mediante a Tarxeta Solred, aplicables nas estacións de servizo adheridas ao acordo.

As condicións contemplan vantaxes no consumo de gasóleo, gasolina, produtos Nexa e GLP, tanto en determinadas estacións de servizo da nosa contorna como na rede preferente do Grupo Repsol, integrada por estacións Repsol, Campsa e Petronor.

Entre as estacións de servizo da contorna incluídas nas condicións preferentes do acordo atópanse:

1. E.S. Monforte: Rúa Doutor Casares, Monforte de Lemos (Lugo).
2. Ceblan S.L.: A Derrasa, Pereiro de Aguiar (Ourense).
3. E.S. A Rabaza: Ourense.
4. E.S. Nadela: Lugo.

Ademais, a Tarxeta Solred conta cunha ampla rede de aceptación que supera as 3.300 estacións de servizo, permitindo que as empresas asociadas poidan beneficiarse das condicións correspondentes tamén nos seus desprazamentos profesionais fóra do territorio.

O servizo incorpora igualmente solucións destinadas a facilitar a xestión dos gastos de mobilidade, como a facturación electrónica, ferramentas de control de consumo e xestión de frotas, así como posibilidades de pagamento de peaxes e outros servizos vinculados ao vehículo, de acordo coas funcionalidades contratadas.

Unha nova colaboración para mellorar a competitividade empresarial:

Con esta sinatura, dende Ribeira Sacra Next seguimos avanzando no noso compromiso de ofrecer servizos, recursos e vantaxes reais ás empresas asociadas, establecendo alianzas con compañías de referencia que permitan mellorar as condicións nas que desenvolven a súa actividade.

O acordo con Repsol responde á importancia que teñen os custos enerxéticos e de mobilidade para numerosas empresas do territorio, especialmente nunha contorna rural como a Ribeira Sacra, onde os desprazamentos e o transporte constitúen elementos fundamentais para o funcionamento de moitas actividades económicas.

Esta nova colaboración súmase aos diferentes convenios que vimos impulsando con entidades financeiras, empresas de servizos, compañías tecnolóxicas e outras organizacións, co propósito de fortalecer o tecido empresarial, favorecer o aforro e contribuír ao desenvolvemento económico da Ribeira Sacra.

Como acceder ás vantaxes do convenio?

As empresas e persoas autónomas asociadas interesadas en beneficiarse deste acordo deberán poñerse en contacto con Ribeira Sacra Next, dende onde facilitaremos información sobre as condicións comerciais e os pasos necesarios para solicitar a Tarxeta Solred.

A concesión da tarxeta estará suxeita aos requisitos establecidos por Solred.

Con esta nova alianza, Ribeira Sacra Next reafirma o seu compromiso de seguir construíndo unha rede de colaboracións que xeren oportunidades, faciliten o día a día das empresas e contribúan a facer da Ribeira Sacra un territorio máis competitivo e con futuro.